அந்தக்காலம்

இனம்புரியாத மகிழ்வினை
தினம் அனுபவித்து
மணம் கமழ்ந்த காலம்

கஷ்டம் கவலை அறியாமல்
நஷ்டம் நடப்புத் தெரியாமல்
இஷ்டம் போல் வாழ்ந்தகாலம்

சண்டை போடும் அண்டைவீடும்
சாயங்காலம் கூடிப் பேசி
சமாதானம் கொண்ட காலம்

சினம் கொண்ட சிநேகிதனை
மனம் கொண்டு நேசித்து
பகை மறந்து கைகோர்த்த காலம்

கூட்டுக் குடும்பம் சிறப்பென்று
கொள்கை மாறா கோட்பாட்டில்
கூடி வாழ்ந்து மகிழ்ந்த காலம்

நாட்டுப்பற்றில் அக்கறை கொண்டு
வீட்டை துறந்த தியாகிபலர்
வீரமுடன் சென்ற காலம்

நம்பிக்கையும் நானயமும்
நாடெங்கும் நிறைந்திருந்த
நடிப்பரியா நல்ல காலம்

ஜாதிமத பேதமின்றி
சமத்துவத்தை பேணிக்காத்து
சம உறவில் வாழ்ந்த காலம்

நீதி காத்த அரசர்களும்
நெஞ்சில் துணிவு கொண்டவர்களும்
நேர்மையாய் ஆண்ட காலம்

தேசப்பற்றில் அக்கறைகொண்டு
நாசம் விளைத்த நச்சுக்களை
இனம்கண்டு அழித்தகாலம்

கள்ளமில்லா கபடமில்லா
வெள்ளை உள்ளம் படைத்தநல்லோர்
மிகுதியாய் வாழ்ந்த காலம்

காசுபணப் பஞ்சத்திலும்
மாசுபடியா எண்ணம் கொண்ட
நேசர்பலர் நிறைந்த காலம்

எத்தனைதான் புதுமைகள்
இவ்வுலகில் வந்தாலும்
அத்தனைக்கும் வித்திட்ட
ஆதிமனிதன் வாழ்ந்த காலம்
அந்தக் காலம்

அதிரை மெய்சா