வரி

ஆட்சியாளர் போடும் வரி
அடிவயிற்றைக் கலக்கும் வரி
மாய்ந்த பின்னும் மனம் வலிக்கும்
மனம் முழுதும் கனமிருக்கும்


வரிகளில் எத்தனை விதம்
வகை வகையாய் முளைத்ததுவே
நிறங்களையும் மிஞ்சிடுமாம்
நிம்மதியும் போனதுவே

அந்த வரி இந்த வரி
அதுக்கும் வரி எதுக்கும் வரி
அரசு பிறப்பித்த ஆணையிது

எந்த வரியானாலும்
எம்மக்கள் நசுங்கிப் போகும்

அடுக்கடுக்காய் ஆயிரம் வரிகள்
அடங்கிடாத விலைவாசி உயர்வு
மடங்கிப் படுத்தும் தூக்கமில்லை
மனதினிலே மகிழ்ச்சியில்லை

சொல்லிமாலா துயர்கொடுக்கும்
சல்லிக் காசும் சபித்து விடும்

ஆடம்பரப் பொருளுக்கு
அரசு விதித்த வரி சரியே

அத்தியாவசியப் பொருளுக்கும்
விதித்த வரி சரிதானோ

சொத்துவரி வருமானவரி
சொகுசாய் இலாபம் அடையும் வரி

சுங்கவரி தங்க வரி
சுகமாய் வருமானம்
கொடுக்கும் வரி

வீட்டுவரி ரோட்டுவரி
விழித்துக் கொள்ள செலுத்தும் வரியே
மாறுபட்டால் அபராதம்
மறுமுறை வேண்டாம் விபரீதம்

சொந்த நாட்டில் வரி செலுத்தல்
சாபம் தானோ மக்களுக்கு

எந்த நாட்டில் வரியில்லை
ஏனோ இங்கு கணக்கில்லை

நெறியுடனே வரி போடு
நீதி தவறா வரி செலுத்து

வரி செலுத்தி வாழ்வது பெருமை
வறியோர்க்கு இல்லையது கடமை

அரசே இதை நீ கவனத்திலேற்று
அடியேனது அன்பின் கூற்று

வரி ஏய்ப்புச் செய்திடல் ஆகா
வறியோரின் வயிற்றில் அடித்தல் கூடா
முறையாய் வரிப்பணம் செலுத்திடலே
முன்னேற்ற நாட்டின் அறிகுறியே

அதிரை மெய்சா

குறிப்பு : இந்தக் கவிதை கடந்த [ 26-09-2013 ] அன்று இலண்டன் தமிழ் வானொலியின் கவிதை நேரம் நிகழ்ச்சியில் ஒலிப்பரப்புச் செய்யப்பட்டது. அதன் காணொளி இதோ...

 

YOUTUBE-ல் எனது கவிதை வரி 14.10 நிமிடத்திலிருந்து ஆரம்பமாகும்.