தவம்

விரதங்கள் பல இருந்து
விடியலை எதிர்நோக்கி
மனதினை ஒருநிலைப்படுத்தி
மாமாங்கம் காத்திருந்து
மதிமறந்து இருப்பதும்
ஒரு வகைத்தவம்


புண்ணியமெனும் சொல்லுக்குப்
புனைப்பெயராய் இருந்து
கண்ணியம் காத்துக்
காரிருள் நீக்கி
எண்ணிய எண்ணம்
ஈடேறி ஏக்கமாய்
பெறப்படுவதுமொரு தவம்

கன்னியரின் கனவுகள்
கரைபடியா க்கத்தியாய்
தனக்குகந்த தணையனை
தாரமாய் க்கொள்வதும்
தாம் செய்த
தவத்திலும்
மிகப்பெரிய தவம்

மடைப்பினம் இல்லா
படைப்பினம் பெற்று
மதியினைக் கூறாய்
ஆறாய் அடைந்து
மகத்துவம் நிறைந்த
மா மனிதனாய்
மகுடம் சூடி
வலம் வருவதும்
வனப்பானதொரு
சிறந்த தவம்

கொடுப்பினையெனும் சொல்லுக்கு
கூடுதல் மெருகேற்றக்
கூடிப்பேசுவோர் வாயை
பாடிப்புகழ வைத்து
குலம் செழிக்க
குழந்தை பாக்கியம் பெறுவதும்
தாம் செய்த தவத்திலும்
மாபெரும் தவம்

அத்தனை சுகமும்
மொத்தமாப் பெற்று
அகிலமே போற்றும்
ஆதிக்க நாயகனாய்
சாதித்து ஆழ்வதும்
அவரவர் செய்த தவத்தில்
ஆனந்தமடையும்
பேரின்ப தவமாம்

தவத்தினில் நற்த்தவமாய்
தாயன்பைப் பெறுவோரும்
தன்மானம் காப்போரும்
ஈடில்லா நலனெய்து
ஈருலகை வெல்வோரும்
இணையில்லா நற்த்தவமாம்
இதிகாசம் படைத்திடத்தான்

அதிரை மெய்சா

குறிப்பு : இந்தக் கவிதை கடந்த [ 18-07-2013 ] அன்று இலண்டன் தமிழ் வானொலியின் கவிதை நேரம் நிகழ்ச்சியில் ஒலிப்பரப்புச் செய்யப்பட்டது. அதன் காணொளி இதோ...



தவம் கவிதை youtube -ல் 5.40 நிமிடத்தில் கேட்கலாம்.