சகுனம்

நாள் பார்த்து நேரம் பார்த்து
நடத்திடும் நற் காரியங்கள்
நாளிகையில் துயர் நிகழ்வாய்
நடந்திடுதே நாள்தோறும்
நாமொன்று நினைக்கையிலே
நாளொன்று நினைத்ததேனோ
நெறி தவறிப் போனதாலே
சகுனத்தின் சாபம் தானோ


சனி பார்த்து சகுனம் பார்த்து
சாதிசனம் ஒன்று கூடி
செய்திட்ட சுப நிகழ்வு
சோகத்தில் சிக்குண்டு
சூனியமாய் ஆவதேனோ
சூட்சமத்தின் மாயைதானோ

சடங்குகள் சம்பிரதாயங்கள்
சகலமும் நடத்திட்டு
மணமுடித்த மறுநாளே
மாங்கல்யம் அறுபடவே
எச்சகுனம் காரணமாம்
யாரிடம் போய்க் கூறுவதாம்

ராகு கேது குளிகையென
ரகமாய் ச்சகுனம் பார்த்தபோதும்
தூரத்து உன் பயணம்
துயரத்தில் விடிவதேனோ
துயருறுவது சகுனமும் தானோ

படைத்தவனின் பாதையிலே
பாருலகில் நடந்து வந்தால்
அனைத்திலுமே நற்ச்ச்சகுனம்
ஆகிடுமே அகிலம் முழுதும்

மூடத்தை மூட்டை கட்டி
மூளைக்கு நீ வேலைகொடு
பகுத்தறிவை பாவித்து
பாவச் சொல்லிற்குப் பாடைகட்டு

சகுனத்தில் நற் சகுனம்
சலனமற்ற நல்லெண்ணம்
இறை மறை கூறுவதோ
சகுனத்தில் சக்தியில்லை
சாபமொன்றே இதற்க்கு எல்லை

இறை வகுத்த நல் வழியை
எந்நாளும் கடைபிடித்தால்
இனி நமக்கு சகுனமெதற்கு
ஈருலகை வெல்வதற்கு

அதிரை மெய்சா

குறிப்பு : இந்தக் கவிதை கடந்த [ 03-07-2013 ] அன்று இலண்டன் தமிழ் வானொலியின் கவிதை நேரம் நிகழ்ச்சியில் ஒலிப்பரப்புச் செய்யப்பட்டது. அதன் காணொளி இதோ...

youtube-ல் என் கவிதை 19.15 வது நிமிடத்திலிருந்து ஆரம்பமாகும்.